مي فاروق ترد على الانتقادات بعد حفل زفافها: “عملت إيه يضايق الناس؟”
ردت الفنانة مي فاروق على الانتقادات التي طالتها عقب احتفالها بزفافها على الفنان محمد العمروسي
ردت الفنانة مي فاروق على الانتقادات التي طالتها عقب احتفالها بزفافها على الفنان محمد العمروسي، مؤكدة أنها لم تفعل شيئًا يستدعي هذا الهجوم.
وفي مداخلة هاتفية مع الإعلامي عمرو أديب عبر برنامجه “الحكاية”، قالت مي فاروق: “أنا معملتش حاجة غير إني اتجوزت، الحمد لله كان يوم جميل مليء بالحب والفرح. كل اللي كانوا موجودين كانوا فرحانين، سواء فنانين أو أصدقاء أو أولادي. لكن بعد كده مش فاهمة ليه حصل كل ده من انتقادات.”
هل هناك أعداء وراء الهجوم؟
وعند سؤال عمرو أديب للفنانة مي فاروق عمّا إذا كانت تمتلك أعداء يقفون وراء هذه الحملة على مواقع التواصل الاجتماعي، أجابت مي:
“معرفش إذا عندي أعداء، لكن علاقتي بكل الناس اللي أعرفهم طيبة. في النهاية، إرضاء الناس غاية لا تدرك. أنا مش عايشة عشان أرضي الناس، كل اللي يهمني هو رضا ربنا وأني أكون أم أولادي يفتخروا بيها. أنا بعمل كل حاجة في الحلال ومليش دعوة بآراء الناس.
وأضافت: “الناس أحرار في آرائهم، لكن معرفش ليه بيقولوا كده. أنا شايفة إنه المهم أعمل اللي يرضي ربنا ويكون مناسب لي ولعائلتي.”
الخوف من الحسد؟
وعن الجدل الذي أثير حول فيديوهات وصور حفل الزفاف، ردت مي فاروق:
“ليه لما أقرر أتجوز بعد 6 سنين من تحمل مسؤولية أولادي وشغلي، يبقى في مشكلة؟ أنا ست عايزة أفرح وأبسط أولادي وأشارك الدنيا فرحتي. عملت إيه يضايق الناس؟ كل حاجة تمت في النور، وبشكل يرضي ربنا، فما المشكلة؟”
كما علقت على تحليل الجمهور لنظرات أولادها في الصور، قائلة:
“الناس بدأت تحلل نظرة ابني وبنتي لي، وبيقولوا أكيد هما مش مبسوطين! محدش يعرف تفاصيل حياتي الشخصية، وأنا مش بحب أشاركها. اللي يهمني هو رضا أولادي وموافقتهم على قراراتي. هم نمرة واحد في حياتي، ولو كانوا غير موافقين على الزواج، ما كنتش هعمله.”
مي فاروق توجه رسالة للجمهور
اختتمت مي فاروق حديثها برسالة تعبر عن موقفها من الانتقادات، قائلة:
“أنا بحاول أكون في حالي وأركز على حياتي وأسرتي. الحمد لله تعلمت من المواقف السابقة إن كل واحد له رأيه. المهم عندي إن ربنا شايفني، وأولادي وجوزي راضيين عني، والباقي لا يعنيني.”
حفل زفاف مي فاروق ومحمد العمروسي
يُذكر أن مي فاروق احتفلت بزفافها على الفنان محمد العمروسي في حفل أقيم يوم 2 يناير 2025، بحضور عدد كبير من نجوم الوسط الفني، وسط أجواء من الفرح والبهجة.
