سرحوا شعرها ولبسوها كويس.. وبعدها رموها الفجر في الشارع وهـ. ــربوا!

كتب/ احمد عمار الشطوري
» في واقعة صادمة، أهالي منطقة أبو النمرس بالجيزة صحوا الفجر على صوت طفلة صغيرة بتعيط لوحدها في الشارع وسط الضلمة والبرد، ماشية بخوف ومش عارفة تروح فين ولا تدور على مين.

» الناس جريت عليها تحاول تهديها وتفهم هي جاية منين، لكن اللي صدمهم أكتر إن البنت كانت لابسة ملابسها كاملة ومرتبة، وشعرها متسرح بعناية، كأن اللي سابها جهزها بنفسه قبل ما يرميها في الشارع.💔

» الأهالي بلغوا الشرطة فورًا، وبدأت الأجهزة الأمنية تفريغ كاميرات المراقبة الموجودة في المنطقة، وهنا ظهرت الحقيقة الصادمة.

» الكاميرا رصدت توك توك وقف في هدوء قبل الفجر، نزلت منه سيدة ومعاها الطفلة، وكان معاهم شاب، وبعد ثواني سابوا البنت في الشارع وهربوا بسرعة.

» التحريات والتحقيقات كشفت إن الطفلة عمرها حوالي سنتين، وإن اللي رموها مش ناس غريبة عنها.. دول أهلها!😭💔

» الأم، وهي فتاة تبلغ 17 سنة، اعترفت خلال التحقيقات إن الطفلة بنتها، وإنها حملت بها من علاقة غير شرعية، واتفقِت مع ابن عمها — سائق التوك توك — إنهم يتخلصوا من الطفلة عن طريق تركها في الشارع قبل الفجر، خوفًا من الفضيـ.ـحة ومحاولة للهروب من المسؤولية.

» وزارة الداخلية أصدرت بيان رسمي أكدت فيه تفاصيل الواقعة، وأوضحت إن أحد الأهالي عثر على الطفلة أمام منزله وأبلغ الشرطة، وبعد التحريات تم ضبط المتهمين، واعترفا بما حدث.

» النيابة العامة قررت حبس المتهمين على ذمة التحقيقات، وتم إيداع الطفلة داخل إحدى دور الرعاية لتلقي الرعاية اللازمة.

» أصعب حاجة في القصة كلها إن الطفلة دي كانت ماشية في الشارع تبكي وتدور على حضن، وهي مش فاهمة ليه أكتر ناس المفروض يحموها قرروا يسيبوها لوحدها في عز الليل.💔