بلاغ للبوليس اختفاء مريض خطير من المستشفى اسمه بيجاد.
البوليس جه موقع البلاغ (المستشفى) و بياخد الاقوال :
س: أسمك وووظيفتك ؟
ج: أنا اسمى الدكتور عمار مدير المستشفى.
س : مين المختفى ؟واختفى من امتى ؟
ج: المختفى مريض اسمه بيجاد واختفى أنهارده الصبح .
س: عرفتوا ازاى انه اختفى؟
ج: بعد خروج المرضى اليوم بعد الفطار للنقاه فى الجنينية، رجعوا كلهم لحجرتهم الا بيجاد، لان لما جاء ميعاد جلسته مكنش موجود فى الحجرة .
س: أسمك ووظيفتك ؟
ج: اسمى وسيم ،شغال دكتور فى المستشفى .
س: انت الدكتور المتخصص لعلاج المريض بيجاد ؟
ج : اه .
س : وحالته ايه؟
ج : متأخرة جدا .
س : إسمك ووظيفتك ؟
ج : انا اسمى سامية ، وشغالة ممرضة فى المستشفى.
ج :انتى اللى بتتعاملي مع المريض بيجاد ؟
ج : اه ، انا المسؤولة عن حجرة رقم 6 ، والحجرة دى فيها اتنين مرضى، بيجاد ومعاه ساهر مريض تانى .
ولما دخلت علشان ميعاد الجلسة بتاعته ملقتوش !! بلغت المدير دكتور عمار عالطول .
س: أسمك ووظيفتك ؟
ج : اسمى جمعة .شغال بواب فى المستشفى
س: شفت بيجاد وهو خارج من البوابة؟.
ج : لا يابيه مشفتهوش ، وهو أساسا ميقدرش يخرج من البوابة ،
البوابة مقفولة احسن واحد يهرب ولا حاجة .
س : يعنى يكون راح فين؟ .
ج : وانا اعرف منين يا بيه !.
*قبل الاختفاء بشهر ….
المدير عمار قال لسامية : انهارده جاى نزيل جديد بس ايه تقيل اوى، عايزك بقى تاخدى بالك منه .
سامية : من عينى هو أنا لية الا الغالين دول. اسمه ايه ؟ومين بقى هيبقى الدكتور المسؤول عنه ياترى ؟
عمار :اسمه بيجاد
وطبعا دكتور وسيم هو هيبقى المسؤول عنه
سامية : بس حضرتك عارف دكتور وسيم دا وضميره الصاحى .
عمار :لا ضمير صاحى ايه !!
هو اللى عليه ينفذ المطلوب منه وبس ، والا هيمشى فورا .
هو يلاقى مرتب ذى اللى بياخده هنا .
*الان…..
الظابط بيسأل عمار:
س : فين المريض ساهر اللى معاه فى الحجرة ممكن استجوبه ؟
ج : لا مينفعش خالص احسن دا حالته خطرة ، وممنوع عنه الزيارة.
س : وايه قصته دا ؟
ج : دا واحد قتل مراته واولاده التلاته ومن ساعة ماجيه مبيتكلمش خالص .
س : وازاى حطنهم مع بعض ؟.
ج : ماهو بيجاد كمان على نفس مستوى الخطورة.
الظابط : تمام
الظابط: امر بابلاغ المرور باوصاف بيجاد للتعرف عليه !!
الظابط: بيسأل عمار :
س : هو بيجاد هنا من امتى وحالته أيه ؟
ج : جيه من حوالى شهر وهو هنا لانه حاول يقتل نفسه ، وعنده ميول عدوانية.
س : طيب تبرر بايه اختفاءه ممكن يكون هرب.؟
ج : معرفش هو مالحقش يقعد معانا وبعدين دا مجنون يعنى تطق فى مخه حاجة يعملها.
الظابط:لصاحبه
مش عارف بس حاسس ان عمار دا وراه حاجة، شكله مش مريح .
*بعد اسبوع بلاغ للشرطة ….
قتل عمار فى مكتبه ؟
التحقيق …
الظابط بيحقق فى المستشفى
س : مين اللى بلغ ؟
ج : أنا الدكتور وسيم اللى بلغت .
س : و أيه اللى حصل ؟
ج : ابدا أنا باجى كل يوم الصبح امر على مكتب المدير عمار علشان اخذ جدول الحالات ، بخبط لاقيت الباب مفتوح وهو مخنوق بالكرافته بتاعته اتصلت بيكو عالطول .
س: وتعرف ايه عن عمار ؟
ج : بصراحة أنا مكنش بيعجبنى اللى بيعمله .
س : وأيه بقى اللى بيعمله ؟
ج : هو انسان مادى جدا واغلبية اللى هنا ناس واصله تعمل الجرايم، وبدل مايتسجنوا يجوا هنا على أنهم مجانين ويعيشوا حياتهم بس بيدفعوا كتير طبعا .
وأنا لما كنت بعترض لانى لازم اطلع تقرير انهم مرضى، وهما ولا مرضى ولا حاجة ولا بياخدوا علاج اصلا .
كان يهددنى انه هيرفدنى علشان كدا كنت بسمع كلامه لانى محتاج الفلوس ، اصل أنا اللى بصرف على امى واخواتى .
استجواب الظابط : للبواب جمعه
س : مين جاء انهارده.؟
ج : مفيش حد جاء انهارده الا زيارة واحدة للمريض ساهر ،واحد بيزوره بيقول قريبه مع انه ممنوع عنه الزيارة بس دا واحد من الكباره
س : وهو ممنوع ليه علشان هو سجين ؟
ج: لا علشان حالته خطرة ، ولانه حاول مرة يقتل واحد من المرضى .
س : سامية أمتى اخر مرة شوفتى فيها عمار ؟
ج : اخر مرة شوفته يوم الجريمة الصبح ،لانه
هو فى الطبيعى بيجى كل يوم الصبح وبعد ربع ساعة كدا بينادي عليه اعمله القهوى بتاعته .
س : ليه هو معندوش فراش؟
ج : لا عنده بس هو متعود يشرب القهوى بتاعته اللى هو بيشتريها وحاطتها فى مكتبه وانا اللى بعملهاله اصله شكاك ومش بيأمن لحد .
الظابط امر المساعدين:
فضولى الكاميرات فى مكتب عمار
نتيجة فحص الكاميرات :
وجدوا اللى دخل عليه ساعة وقوع الجريمة ،كان من ضهره وشه مش باين ولابس لبس المرضى !!!
*بعد فترة …
امناء المخزن بينزلو المخزن كل شهرا يعملو جرد ، علشان يشوفو الناقص و يشتروا.
.وهما نزلين شموا رايحة كريهة جدا من المخزن بيفتحوا لقوا مين ؟
جثة بيجاد الهارب منفوخ ومتبهدلة ومليانة دود ، بلغوا البوليس فورا .
الظابط بيحقق.مع امين المخزن…
س : عرفتوا منين ان الجثة دى هو المريض بيجاد؟
ج : من الرقم اللى مكتوب على لبسه ، لان كل مريض هنا لازم يكون مكتوب رقم على لبسه ، ومتسجل اسمه بالرقم دا.
الظابط : بيقول لصاحبه
يعنى احنا عندنا جريمتين قتل دلوقتي، بيجاد وعمار مين بقى اللى قتلهم ؟ وليه ؟ وهل واحد هو اللى قتل الاتنين ولا ايه ؟
الظابط :استدعاء للزائر اللى اللى جاء قبل الحادثة يزور المريض ساهر .
مكالمة للظابط: ألوه
الزائر :أنت عاوز تستدعينى أنا، انت عايز تسوق سمعتى انت متعرفش أنا مين ؟
الظابط :لا معاليك مكنش قصدى خالص احنا كنا عايزين بس معلومات يمكن تفدنا فى التحقيق ،
بس خلاص حضرتك ولا تزعل نفسك.
المتصل : لا أنا مش زعلان بس ممكن تسأل ياعم السؤال اللى نفسك فيه فى التليفون .
الظابط : أنا بس كنت عايز اعرف هل فعلا يقرب لحضرتك المريض ساهر ، اللى حضرتك زرته فى المستشفى ؟
وأيه اللى حصل فى الزيارة دى ؟
المتصل . ساهر دا مين ؟!
الظابط: المريض اللى حضرتك كنت بتزوره فى مستشفى الامراض النفسية بتاعت الدكتور عمار ؟
المتصل . مريض!! لا أنا كنت بزور مدير المستشفى عمار .
اصل أنا كنت شريك فى المستشفى دى معاه وطلعت شراكة زى الزفت وفضيت القصة دى من زمان ، بس كان فى شوية اوراق بينا كنت بخلصها معاه .
الضابط : استدعاء للبواب جمعه بسرعة.
س : انت كذبت ليه وقلتلى ان اخر زيارة كانت لساهر ؟ وهى مش لساهر ؟
ج : جمعه. وانا مالى يابيه مش انا اللى قلت ..
س : أمال مين اللى قال ؟
ج: الدكتور. وسيم هو اللى قال ، حتى ساعاتها جيه بنفسه واستقبله ،ولما سالته قالى دا زائر للمريض ساهر.
الظابط : استدعاء لوسيم
س: كذبت ليه على البواب وقلت ان الزائر دا جاى لساهر وهو مش جاى لساهر ولا حاجة ؟
ج : وسيم أنا مليش دعوة هو الدكتور عمار اللى كان مفهمنا كدا ، كل مايجى نقول انه جاى لساهر علشان محدش كان يعرف الشراكة اللى بنهم .
الظابط : لصاحبه
انا عرفت مين القاتل !! مفيش غير الدكتور وسيم .
صاحبه ليه ؟
الظابط : هو عرف منين ان فى شراكة بين عمار والزائر دا !
وهو كان سر بين عمار والزائر على حسب قول الزائر نفسه .
اكيد لما عرف حاب يبتز عمار بالموضوع دا ، انه يفشى السر اتخانق معاه او عمار هدده بالرفد مثلا.
مسك فيه وقتله ويلبسها للزائر لانه اخر واحد زار عمار .
الظابط: استدعاء وسيم
س : أنت متهم بقتل عمار ؟ وكمان بيجاد؟
ج : أنا وأقتلهم ليه أنا ماشى جنب الحيط علشان اهلى اللى فى رقبتى .
س : امال عرفت منين ان عمار والزائر شركاء ؟
ج : انا معرفش مين قال كدا !
الظابط: انت قلت فى التحقيق ذلة لسان وقعتك ؟
قلنا بقى قتلتهم ليه وازاى وهتشرف معانا لغاية ماتعترف ؟
وسيم لا وعلى أيه أنا هقول على كل حاجة من الاول !
أنا ماقتلتش عايزين تعرفوا مين القاتل روحوا المستشفى وهاتوا ساهر اللى كان مع بيجاد فى الحجرة ، وانتوا هتعرفوا مين القاتل ؟
الظابط : أحنا ازاى مافكرناش فيه وخصوصا انه أساسا قاتل مراته وولاده ، وكمان اللى كان فى الكاميرا كان لابس لبس مريض ،
والبواب قال انه حاول مرة يقتل مريض فى داخل المستشفى !!
احنا لازم نروح المستشفى ونحقق مع ساهر دا لما نشوف أخرتها .
الظابط : بيسأل سامية
س : فين حجرة ساهر عايزين نحقق معاه ؟
ج: اصله اصله…
س : اصل أيه اتكلمى ؟
سامية. هو مش موجود خالص فى المستشفى !!
س : يعنى أيه مش موجود فى المستشفى آمال فين ؟
ج : هو مختفي من يوم جريمة قتل عمار.
س : يعنى أيه مختفي طب مابلغتوش ليه ؟
ج : أنا مليش دعوة دكتور وسيم هو المسئول عنه .
استجواب وسيم :
س : يعنى أيه انت عارف ان ساهر هو القاتل وهربته ؟
ج : أنا هربت مين !؟
الظابط : ساهر مش موجود فى المستشفى وسامية قالت انك كنت عارف وهو مسؤول منك .
وسيم. لا هى بقت كدا انا هقول كل اللى اعرفه .
اساسا بيجاد كان فى السجن لان عليه احكام كتيرة فى قواضى كلها توظيف اموال خد 10مليون دولار من ناس كبيرة فى البلد ،
وبعدين اتفق مع عمار انه يهربه وعمل خطة .
الخطة :هى ان بيجاد يقتل المريض ساهر ويبدل اللبس معاه ،
ويرميه فى المخزن ويخترعوا قصة اختفاء او هروب بيجاد.
ولما يلاقوا جثة ساهر متحللة بلبس بيجاد،
هيفتكروا انها جثة بيجاد ويكون بيجاد هرب وتتقفل القضية .
الظابط: وبعدين ؟
جاء الراجل المهم دا وقابل عمار.
وقاله :ان لازم يخلصه من بيجاد، علشان كان هو واحد من اللى نصب عليهم بيجاد فى مبلغ كبير .
وقال لعمار :”عايزك تخلصنى منه .لأنى عايز انتقم منه”.
او تخليه يرجعلى فلوسى اللى نصب علية فيها .
فعلا قبل ما بيجاد ينفذ الخطة. اللى كان متفق عليها مع عمار : انه يقتل ساهر ويرميه فى المخزن ويهرب .
المدير عمار هو اللى قتل بيجاد ورماه فى المخزن .
الظابط :
س : وانت عرفت منين!!؟
ج : وسيم. لان بيجاد مكنش فى حجرته وكان مفيش الا ساهر ، ولما كنت بسال فين المريض بيجاد كان بيقولى هو فى عنبر تانى وتبع دكتور تانى ومن دلوقتي مبقاش مسؤليتك وهو مكنش أساسًا موجود فى المستشفى.
بعدين جاء الرجل المهم لعمار مرة تانى فى المكتب ، وفى المره دى أنا كنت رايح لعمار المكتب .
سمعت الحوار “اتخانقوا مع بعض على فض الشراكة واوراق كدا ، وعمار هدد الراجل انه هيفضحه ويعرف السوشيل ميديا .
طبعا اتجنن الرجل المهم وقال لعمار مش هتلحق” خرج من المكتب وكلم سامية على جنب ومشى .
أنا رحت لسامية وقولتلها هتقوليلى كان بيقولك أيه الرجل دا !!
والا هفضحك عند عمار .
سامية قالتلى لا هقولك ماتقطعش عيشى :
عايزنى اسيب المريض ساهر يدخل على عمار المكتب وانت عارف ميوله العدوانية وفى المقابل هيدينى فلوس كتير .
وتانى يوم لاقينا عمار مقتول وساهر مختفى ، قلت يبقى اكيد ساهر قتل عمار وهرب وسامية هى اللى دخلت ساهر على عمار .قلت مليش دعوة وخوفت ابلغ البوليس ، أدخل فى س وج قلت اكيد انتوا هتكتشفوا لوحدكوا هى دى كل الحكاية .
الحكم فى القضية:
تم القبض على سامية وصدر الحكم عليها بخمس سنين لاشتراكها فى جريمة قتل عمار ، وتضليل العدالة.
سامية أنا معملتش حاجة .
والراجل المهم مفيش اى تهمة عليه ولا دليل.
وساهر مختفى حتى الآن.
ووسيم خرج من القضية ، مفيش عليه اى دليل وكمان علشان هو كان شاهد اثبات وقالهم على كل حاجة وهو ملوش يد فى حاجة .
الحكم…
اتقفلت القضية على ان المدير عمار قتل بيجاد ، وساهر قتل عمار وهرب ، ومطلوب القبض عليه .
*بعد سنة…المفاجأة !!
وسيم بيتكلم فى التليفون: الو مسيو فرانكو شكرا كل تمام والفلوس وصلت فى حسابى فى البنك فى سويسرا.
فرانكو : طبعا زى ماتفقنا دانت اللى انقذت حياتى،
دا لولا سمعت عمار وهو بيتفق مع الراجل على قتلى ، وانا قاعد فى المستشفى على انى ساهر بعد ماقتلت ساهر ورميته فى المخزن ،
وجيت قلتلى عالطول .
كان زمان عمار هو اللى خلص عليه بس أنا سبقته وقتلته !
دا لولاك انت مكنش طلعتلى شهادة الوفاة .
وانا عايش دلوقتي باسم تانى وهبدا من جديد هنا .
أساسًا اسم بيجاد !!!
دا كان وشه وحش عليا .
- وسيم بيقول لبيجاد : بس ..ايه رايك فى دماغى و دبست سامية احسن،
علشان هى انسانة مادية وبتاعت فلوس كانت عايزة تدبسنى بس على مين قال أيه أنا المسؤول عن ساهر وهو فين ساهر اهو غار فى داهية هو كدا كدا كان هيتعدم .
